काठमाडौं१९असार। परम्परागत कृषि प्रणालीमा सुधार गरी कृषि उत्पादनलाई बढाउन दिन रुकुमपश्चिममा यान्त्रिकरणलाई जोड दिइएको छ । विभिन्न उपकरणको प्रयोग बढाई परम्परागत खेती प्रणालीलाई आधुनिकीकरण गर्ने उद्देश्यले जिल्लाका कृषकलाई हाते ट्र्याक्टरलगायत आधुनिक औजार वितरण भइरहेका छन् । यसअन्तर्गत कृषि विकास कार्यालयले यान्त्रिकरण र व्यवसायीकरण गर्ने ध्येयले जिल्लाका २९ वटा समूह तथा सहकारीलाई अनुदानमा हाते ट्र्याक्टर उपलब्ध गराएको छ । प्रधानमन्त्री कृषि आधुनिकीकरण कार्यक्रमअन्तर्गतको २० लाख बजेट र किसानसमेतको लगानीमा जिल्लाका विभिन्न व्यक्ति, समूह, फर्म र सहकारीलाई अनुदानमा हाते ट्र्याक्टर वितरण गरिएको कार्यालयले जनाएको छ । कार्यालयका निमित्त प्रमुख राजेश साहका अनुसार चालू आर्थिक वर्ष २०७६÷७७ को यान्त्रीकरण वितरण कार्यविधि अनुसार पकेट तथा ब्लक कार्यक्रममा आएको बजेटले ती हाते ट्र्याक्टर वितरण गरिएको छ । कूल ६८ वटा हाते ट्र्याक्टर वितरण गर्ने कार्यक्रम रहेकामा बाँकीलाई पनि छिट्टै वितरण गरिने उहाँको भनाइ छ । यसका लागि व्यक्ति तथा फर्मलाई ५०, समूहलाई ६० र सहकारीलाई ७० प्रतिशत अनुदानमा हाते ट्र्याक्टर वितरण भइरहेको छ । कृषकको मागका आधारमा हाते ट्र्याक्टर वितरण गर्ने कार्यक्रम स्वीकृत भएको कृषि विकास कार्यालयले जनाएको छ । हाते ट्र्याक्टरमार्फत कृषि कर्ममा लागेका किसानलाई आधुनिक कृषि प्रणालीमा जोड्न सजिलो हुने विश्वास गरिएको छ । वितरण गरिएका ट्र्याक्टर खेत तथा पाखोबारीमा पनि सजिलै प्रयोग गर्न सकिने खालका रहेको कार्यालयले बताएको छ । परम्परागत शैलीमा खेतीपाती गर्दा दुःख धेरै हुने तर उत्पादन कम हुने समस्या रहेको अवस्थामा यान्त्रिकीरणलाई जोड दिइ उत्पादन बढाउने लक्ष्य सो कार्यालयले लिएको छ । जिल्लामा कृषि पेशा अझै पनि परम्परागत शैलीमै चलिरहेको छ । स्थानीय काठे हलोसहित स्थानीय कुटो, कोदालाका भरमा खेतीपाती भइरहेको छ । तर पछिल्ला केही वर्षदेखि भने कृषिमा यान्त्रिकीकरणलाई जोड दिइएको छ । प्रविधिले खेतीपाती गर्नमा सहजता आउनुका साथै कृषि उत्पादनमा समेत वृद्धि भइरहेको कृषकको भनाइ छ ।
२०८२ माघ ७