मोरङ, १४ मङ्सिरः कोशी प्रदेशका मुख्यमन्त्री हिक्मतकुमार कार्कीले प्रदेशमा लैङ्गिक हिंसा नियन्त्रण गर्न आवश्यक कानुन निर्माण गर्ने बताउनुभएको छ ।
रङ्गेली नगरपालिकाद्वारा आज ३४औँ अन्तरराष्ट्रिय लैङ्गिक हिंसाविरुद्ध १६ दिने अभियान–२०२५ अन्तर्गत एकदिने किशोरी स्वास्थ्य परामर्श मेलाको उद्घाटन गर्दै मुख्यमन्त्री कार्कीले आगामी दिनमा प्रदेशमा सबै प्रकारको महिला हिंसा नियन्त्रणका लागि प्रदेशसभाबाट आवश्यक कानुन निर्माण गर्ने जानकारी दिनुभयो ।
मुख्यमन्त्री कार्कीले महिला हिंसा घृणित कार्य हो भन्ने कुरा सबै पुरुषले सङ्कल्प गरेमा समाजबाट यो हट्ने बताउनुुभयो । उहाँले किशोरीको महिनावारी बढ्दो उमेरसँगै यो प्राकृतिक प्रक्रिया भएकाले त्यसबेला परिवारका अभिभावकले पोषिलो खाना, हौसला प्रदान एवं स्वास्थ्यसम्बन्धी जानकारी दिनुपर्ने सुझाव दिनुभयो ।
प्रदेश सरकार विद्यालय र क्याम्पसलाई लागूपदार्थ दुव्र्यसन मुक्त बनाउन, विद्यार्थीलाई नैतिकवान् बनाउन र समाजलाई चरित्रवान् बनाउन ‘म अघि बढ्छु’ अभियानलाई दिगो र स्थायी बनाउन कानुन निर्माण गरी सबै पालिकालाई सहभागी गराइने मुख्यमन्त्री कार्कीले बताउनुभयो ।
कोशी प्रदेशसभाकी उपसभामुख सिर्जना दनुवारले समाजबाट महिला हिंसा अन्त्य गर्न सचेतना अभियान सञ्चालन गर्नुपर्नेमा जोड दिनुभयो । इटहरी नगरपालिकाका प्रमुख दिलीप अग्रवाल (वगडिया), उपप्रमुख झुमाकुमारी निरौला, लेटाङ नगरपालिकाका उपप्रमुख कृष्णकुमारी पोखरेल निरौला, गैरसरकारी संस्था महासङ्घ मोरङका अध्यक्ष विष्णु शर्मा पन्त लगायतले समाजमा छोराछोरीबीच हुने भेदभाव र महिला हिंसा कम गर्न सबैले आ–आफ्नो क्षेत्रबाट कार्य गर्नुपर्ने बताउनुभयो ।
–––