उदयपुर (गाईघाट), २२ माघः चौदण्डीगढी नगरपालिका–४ बसाहा सञ्चालन भएको २००७ सालका प्रजातान्त्रिक योद्धा स्व नारदमुनि थुलुङको ११औँ स्मृति फुटबल प्रतियोगिताको फाइनल खेलको उपाधि सहलेस फुटबल क्लब सिरहाले जितेको छ ।
आज भएको फाइनल खेलमा सहलेस फुटबल क्लब सिरहाले द योङ ब्रदर्श इटहरीलाई ५–२ गोलअन्तरले हराउँदै उपाधि जितेको हो । सिरहाकोतर्फबाट विदेशी खेलाडी अब्दुलले दुई गोल र अनील चामलिङ राईले दुई गोल तथा अनील मगरले एक गोल गरे ।
यस्तै, योङ ब्रदर्शस् इटहरीकोतर्फबाट विदेशी खेलाडी फोफोले दुई गोल गरेका थिए । जितसँगै सिरहाले ट्रफीसहित नगद रु पाँच लाख हात पारेको छ । यस्तै, दोस्रो हुने द योङ ब्रदर्शस् इटहरीले रु तीन लाख नगद प्राप्त गरेको प्रतियोगिता संयोजक दिनेश राईले बताए ।
विजेतालाई चौदण्डीगढी नगरपालिकाका प्रमुख कालु लामाले नगद पुरस्कारसहित प्रमाणपत्र वितरण गरे । यही माघ १६ गतेदेखि सञ्चालन भएको ११औँ नारद स्मृति फुटबल प्रतियोगितामा आठ टोलीले सहभागिता जनाएका थिए ।