काठमाडौँ, २४ माघः नेपाली कांग्रेसले वरिष्ठ अभिनेता सुनिल थापाको निधनले नेपाली चलचित्र क्षेत्रमा अपूरणीय क्षति पुगेको जनाएको छ ।
कांग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुुलालले आज शोक विज्ञप्ति जारी गरी काठमाडौँको थापाथलीस्थित नर्भिक अस्पतालमा उपचारका क्रममा ६८ वर्षको उमेरमा थापाको निधन भएकोप्रति गहिरो दुःख व्यक्त गर्नुभएको हो ।
वरिष्ठ अभिनेता थापाको असामयिक निधनले नेपाली मात्र नभई भारतीय चलचित्र क्षेत्रमा समेत अपूरणीय क्षति पुगेको कांग्रेसले बताएको छ । बहुआयामिक व्यक्तित्व, कर्मशील कलाकार र अनुकरणीय स्रष्टाका रूपमा थापाले छोडेर जानुभएको रिक्तता लामो समयसम्म महसुस भइरहने कांग्रेसले जनाएको छ ।
नेपाली चलचित्र क्षेत्रमा ‘खलनायक’ पात्रलाई पनि नायक सरहको उचाइ, गरिमा र सम्मान दिलाउन सफल स्वर्गीय थापा ‘राते काइला’ का नामबाट आमदर्शकमाझ अत्यन्त लोकप्रिय र स्मरणीय रहेको कांग्रेसले बताएको छ ।
चार दशकभन्दा बढी समयसम्म अभिनय, मोडलिङ, खेलकुद तथा चलचित्र उद्योगका विविध आयाममा उहाँले पुर्याउनुभएको सशक्त, समर्पित र प्रेरणादायी योगदान नेपाली चलचित्र इतिहासमा सदा अमिट रूपमा अङ्कित रहने कांग्रेसले जनाएको छ ।
यसैबीच, अभिनेता थापाको निधनप्रति कांग्रेस सभापति गगनकुमार थापाले गहिरो दुःख व्यक्त गर्नुभएको छ । “नेपाली चलचित्र क्षेत्रका वरिष्ठ अभिनेता सुनिल थापा ‘राते काइला’ को निधनको खबरले मलाई स्तब्ध र दुःखित बनाएको छ, नेपाली र भारतीय चलचित्रमा सशक्त भूमिका निर्वाह गर्नुभएका उहाँको निधनबाट सम्पूर्ण चलचित्र उद्योगले अपूरणीय क्षति व्यहोरेको छ”, सभापति थापाले भन्नुभएको छ ।
स्वर्गीय अभिनेता थापाले अभिनय, मोडलिङ, खेलकुद तथा चलचित्र उद्योगका विविध पक्षमा उहाँले पुर्याउनुभएको योगदान सदा स्मरणीय रहने सभापति थापाले बताउनुभयो । उहाँले अभिनेता थापाको निधनप्रति भावपूर्ण श्रद्धाञ्जली अर्पण गर्दै आत्माको चिरशान्तिको कामनाका साथै शोकसन्तप्त परिवारजनप्रति पार्टी र आफ्नो व्यक्तिगत तर्फबाट गहिरो समवेदना प्रकट गर्नुभएको छ ।
—