किताब यात्राको यात्रा सुरु

किताबलाई लिएर यात्रा गरेको पुस्तक किताब यात्रा राजधानीमा आज एक समारोहका बीच विमोचन भयो ।
कार्यक्रमका प्रमुख अतिथी शताब्दी पुरुष सत्यमोहन जोशीद्वारा विमोचित सो कार्यक्रममा जोशीले नेपालमा यस प्रकारको पुस्तक नयाँ भएको बताउनुभयो । भन्नुभयो “यात्रा आफैँमा रोमान्चक र रहस्यले भरिएको हुन्छ , चाहे त्यो कोलम्बसको अमेरिका पत्ता लगाउने यात्रा होस् वा चीनका राजा कुब्ला खाँलाई भेट्न अरनिको पुगेको हुन् । संसारमा सबै प्रकारको यात्रा देखेपनि किताब लिएर यात्रा गरेको र त्यसको पुस्तक बनेको यो पहिलो पल्ट हो ।”
कार्यक्रममा विशिष्ट अतिथि भरत जंगमले किताब लेखन आफँैमा यात्रा जस्तै चुनौती भएपनि लेखक पुष्पलताले यात्रा र लेखन दुवै चुनौति एक्लै लिएर आफू साहसी भएको उदाहरण व्यक्त गर्नुभयो ।
अर्का अतिथि बेन्जु शर्माले किताब यात्रा मार्फत पुष्पलताले नेपाली समाज, नेपाली लेखक नेपाली पाठक देखाएकोमा खुशी व्यक्त गर्दै भन्नुभयो “ नेपाली महिलालाई उर्जा प्रदान गर्ने यो पुस्तकले हामीलाई धेरै बाटो देखाएको हो ।”
समिक्षक रमेश सुभेच्छुकले किताब रिदमिक भएको बताउँदै केही प्राविधिक त्रुटि देखिए पनि किताब समष्टिमा राम्रो भएको बताउदै भन्नु भयो “ किताबमा पुस्तकको पहाड , प्रेमिल पोखरा , बरालिएको बोली , दलदलेमा हलहले जस्ता शीर्षकले कविता पढे जस्तै भएको छ ।
नेपाली समाजमा नयाँखालको पुस्तक ल्याउनु आफ्नो उद्देश्य भएको बताउँदै किताब यात्रा पुस्तक प्रकाशन गरेको सिमल बुक प्रकाशनका प्रकाशक कमलले बताउनुभयो र भन्नुभयो विश्वलाई नयाँ सन्देश दिने यो पुस्तक बुक जोर्नी भनेर चाँडै अंग्रेजीमा पनि आउँदैछ ।“
लेखिका पुष्पलता आचार्यले आफुले साठी वटा पुस्तक लेखिसके पनि यो पुस्तक बिमोचन गर्नुको अर्थ नेपाली जनजनमा नेपाली महिला कमजोर हुन नहुने बताउदै भन्नुभयो “ मेरो आमा बितेको एक महिना हुँदैछ । म आमा बितेको भनेर रोएर बस्न हैन काम गरेर हसाउँन चाहन्छु ।”