गण्डकी, २२ मङ्सिर : गण्डकी प्रदेशका प्रमुख डिल्लीराज भट्टले ऋग्वेदजस्ता पूर्वीय वाङ्मयसँग सम्बन्धित ग्रन्थ नेपाली समाजका सांस्कृतिक धरोहर रहेको बताउनुभएको छ ।
मुक्त फाउन्डेसन पोखरा र गण्डकी प्रज्ञा प्रतिष्ठानद्वारा आज आयोजित दुई दिवसीय ऋग्वेद र हिमालय : दोस्रो अन्तर्राष्ट्रिय सम्मेलनको उद्घाटन गर्दै उहाँले हिमालय क्षेत्रको सांस्कृतिक तथा धार्मिक परिदृश्यलाई ऋग्वेदले गहिरो रूपमा प्रभाव पारेको बताउनुुभयो । यो मानव जातिको सबैभन्दा पुरानो र प्रभावशाली ग्रन्थमध्ये एक भएको बताउँदै उहाँले यस्ता ग्रन्थहरू परम्परागत धर्मग्रन्थ मात्र नभएर सांस्कृतिक धरोहर रहेको बताउनुभयो ।
नेपाललगायत विभिन्न देशका वेदका ज्ञाताले सम्मेलनमा ऋग्वेद र हिमाली सभ्यताका आयामसम्बन्धमा गरिने छलफल फलदायी हुने उहाँले विश्वास व्यक्त गर्नुभयो । सम्मेलनबाट आर्जित ज्ञान र अनुभवलाई प्रयोग गर्दै धर्म, संस्कृति तथा पर्यटनसम्बन्धी नीतिनिर्माण र कार्यान्वयनमा रहेका पदाधिकारी एवम् प्राज्ञिकहरू लाभान्वित हुने उहाँले बताउनुभयो ।
वैदिक ज्ञान एवम् आधुनिक समाज विज्ञानका ज्ञाताहरूका बीचमा वस्तुगत अध्ययनका लागि सहकार्यको नयाँ सम्भावना खुलेको उल्लेख गर्दै उहाँले यस्ता कार्यक्रमले हिमाली समाज र संस्कृतिका मूल्य र मान्यताको जागरणको ढोका खुल्ने धारणा राख्नुभयो ।
ऋग्वेदीय सिद्धान्तहरूको पुनरावलोकन र पुनर्जीवन प्रदान गर्ने उद्देश्यका साथै हिमालय संस्कृतिमा परेको प्रभाव र आधुनिक चुनौतीको समाधानका लागि सम्भाव्य अन्वेषण गर्ने प्रयासले मूर्तरूप लिन सकोस् भनी उहाँले शुभेच्छा व्यक्त गर्नुभयो ।
गण्डकी प्रज्ञा प्रतिष्ठानका कुलपति सूर्यबहादुुर खड्का बिखर्चीले संस्कृति र पर्यटन मूल मन्त्रका साथ ऋग्वेदीय परम्परा र हिमालय क्षेत्रका विविध संस्कृतिहरूसँगको यसको सम्बन्धको गहिरो अन्वेषण गर्ने लक्ष्यका साथ अन्तर्राष्ट्रिय सम्मेलन गरिएको बताउनुभयो ।
देशविदेशका विज्ञ तथा अनुसन्धाता सम्मिलित कार्यक्रममा ऋग्वेद तथा वैदिक मान्यता, विधि र आयाम, हिमालय संस्कृति र पर्यटनका बारेमा अनुसन्धानात्मक लेख प्रस्तुत गरिने र विद्वत छलफल गरिने जानकारी दिँदै मुक्त फाउन्डेसनका दामोदर त्रिपाठीले कार्यक्रममा २८ वटा कार्यपत्र प्रस्तुत गरिने बताउनुभयो ।
