काठमाडौं । वैदेशिक रोजगारीका लागि विदेश जाने नेपाली श्रमिकका लागि नेपाल वायुसेवा निगम (नेपाल एयरलाइन्स) ले विशेष छुटसहित नयाँ भाडादर योजना लागू गरेको छ। निगमले साउदीको दमाम, कतारको दोहा, दुबई र मलेसियाको क्वालालाम्पुर गन्तव्यतर्फका उडानमा प्रत्येक उडानका १० सिटमा १० प्रतिशत छुट उपलब्ध गराउने घोषणा गरेको हो। निगमले शुक्रबार जारी गरेको विज्ञप्तिअनुसार श्रमिक यात्रुको सर्वसुलभता र सहुलियतका लागि यो योजना लागू गरिएको हो। श्रम गन्तव्यतर्फ यात्रा गर्नेले आवश्यक कागजात सहित नेपाल एयरलाइन्सका नेपालस्थित टिकट काउन्टरबाट यस छुटको सेवा लिन सक्नेछन्। निगमले यस्तो सहुलियतले वैदेशिक रोजगारीमा जाने नेपाली श्रमिकलाई यात्रा खर्चमा राहत पुग्ने विश्वास व्यक्त गरेको छ।
