काठमाडौँ, १७ माघः नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले मुलुकलाई अस्थिर तथा जोखिमपूर्ण अवस्थाबाट जोगाउन सबै राजनीतिक दल संवेदनशील हुनुपर्ने बताउनुभएको छ ।
सोलुखुम्बु–काठमाडौँ सम्पर्क मञ्चद्वारा आयोजित बृहत् भेलालाई सम्बोधन गर्दै संयोजक दाहालले आसन्न निर्वाचन विशेष परिस्थितिबाट उत्पन्न राजनीतिक अभ्यासका रूपमा लिनुपर्ने र त्यसले मुलुकमा विद्यमान राजनीतिक सङ्कटको समाधान गर्ने बताउनुभयो । देशको असाधारण परिस्थितिमा आकस्मिक रूपमा घोषणा गरिएको निर्वाचन सामान्य अवस्थाको प्रक्रिया नभएको उल्लेख गर्दै उहाँले राष्ट्रिय तथा अन्तरराष्ट्रिय प्रभावका साथै विभिन्न प्रतिक्रियावादीको षड्यन्त्र परास्त गर्नुपर्नेमा जोड दिनुभयो ।
संयोजक दाहालले मुलुकमा उत्पन्न नयाँ राजनीतिक घटनाक्रमको विश्लेषण गर्दै विभिन्न कम्युनिष्ट समूह तथा समाजवादी विचारधारालाई एकताबद्व गरी शक्तिशाली कम्युनिष्ट पार्टी निर्माणतर्फ आफू क्रियाशील रहेको उल्लेख गर्नुभयो ।