काठमाडौँ, २५ माघः क्षेत्रीय पर्यटन प्रवर्द्धन र बहुपक्षीय सहकार्यलाई थप सुदृढ पार्ने उद्देश्यले बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक) नेटवर्क अफ टुर अपरेटर्सको तेस्रो बैठक आज काठमाडौँमा सम्पन्न भएको छ । बैठकले बिमस्टेक सदस्य मुलुकमा पर्यटक बढाउन र भ्रमण बढाएर बहुपक्षीय सहकार्यलाई बलियो बनाउने निष्कर्ष निकालेको हो ।
दुई दिने बैठकमा बिमस्टेक सदस्य सातै मुलुकका टुर अपरेटर र केही देशका पर्यटन अधिकृत सहभागी थिए । बैठकले एकअर्का मुलुकबीच पर्यटनमा सहकार्य बढाउने उद्देश्यले बिमस्टेक टुरिजम मार्ट आयोजना गर्ने समझदारी बनेको छ । यद्यपि, उक्त मार्ट कहिले र कुन देशले गर्ने भन्ने खुलाइएको छैन । त्यसैगरी बिमस्टेक मुलुकमा पर्यटकलाई सहज आवत जावतका लागि प्रवेशाज्ञा (भिषा) फ्रि गर्ने, मुद्रा सटहीलाई सहज बनाउनेबारे पनि बैठकले निष्कर्ष निकालेको छ ।
बिमस्टेक मुलुकबीचको सहकार्यलाई फराकिलो बनाएर अन्तरदेशीय पयृटन प्रवद्र्धनका साथै आपसी हित र सहयोगलाई थप बलियो बनाउने सन्दर्भमा बैठक फलदायी भएको नेपाल पर्यटन बोर्डका प्रमुख कार्यकारी अधिकृत (सिइओ) दीपकराज जोशीले राससलाई जानकारी दिनुभयो । बैठकलाई सहकार्य र रणनीतिक योजना विकासको प्रमुख अवसरका रूपमा चित्रण गर्दै उहाँले नेपालले बिमस्टेक साझेदार राष्ट्रसँग मिलेर पर्यटन प्रवद्र्धनमा महत्वपूर्ण भूमिका खेल्ने बताउनुभयो ।
“दुई दिनको बैठका तीन महत्वपूर्ण मुद्दामा उपलब्धीमूलक छलफल भयो । बौद्ध तथा क्रुज सर्किटको सञ्चालन ढाँचालाई सहज बनाउने, भिषा र विदेशी मुद्रालाई सहज बनाउने र पर्यटकको सङ्ख्या र भ्रमण बढाउन बिमस्टेक टुरिजम मार्ट गर्ने सकारात्मक समझदारी बनेको छ”, सिइओ जोशीले भन्नुभयो ।
नेपाल पर्यटन बोर्डको सहजीकरण तथा समन्वयमा भएको बैठकमा बिमस्टेक सदस्य राष्ट्र नेपाल, भारत, भुटन, बङ्गलादेश, म्यानमार, श्रीलङ्का र थाइल्यान्डका पर्यटन सम्बन्धित निकाय तथा निजी क्षेत्रका सरोकारवालाको सहभागिता थियो । आगामी बिमस्टेक बैठकमा समुद्रदेखि हिमालसम्म (सिटु टु माउन्टेन) थिममा छलफल गर्ने सहमति भएको छ ।
संस्कृति, पर्यटन तथा नागरिक उड्डयन मन्त्रालयका सचिव विनोदप्रकाश सिंह तथा बिमस्टेकका निर्देशक श्री सी थु आङले संयुक्त रूपमा उद्घाटन गर्नुभएको बिमस्टेक टुर अपरेटर्सको बैठकमा दुबै दिन बोर्डका सिइओ जोशीले अध्यक्षता गर्नुभएको थियो ।
यसअघि बैठकको उद्घाटनगर्दै पर्यटन मन्त्रालयका सचिव सिंहले नेपालका दिगो पर्यटन प्रवर्द्धनको साथै क्षेत्रीय पर्यटन सहकार्यलाई नयाँ उचाइमा पुर्याउन बिमस्टेक नेटवर्क बैठक उपयोगी हुने विश्वास व्यक्त गर्नुभएको बोर्डले जारी गरेको विज्ञप्तिमा उल्लेख छ । उहाँले सीमापार पर्यटन प्रवर्द्धन तथा साझा सम्पदाको अधिकतम उपयोग बिमस्टेक सदस्य राष्ट्रका लागि लाभदायक हुने बताउनुभयो ।
बिमस्टेकका निर्देशक श्रीसी थु आङले पर्यटनलाई क्षेत्रको प्रमुख आर्थिक क्षेत्रका रूपमा परिभाषित गर्दै, सहकार्यद्वारा यस क्षेत्रका पर्यटन सम्भावनाको सदुपयोग गर्न सकिने बताउनुभयो । उहाँले क्षेत्रीय सहकार्यले दीर्घकालीन साझेदारी निर्माण गर्नुका साथै रोजगारी, राजस्व वृद्धिमा योगदान पु¥याउने र जनता–जनताबीचको सम्बन्धलाई थप सशक्त बनाउने विश्वास व्यक्त गर्नुभयो ।
बोर्डका अनुसार बिमस्टेक बौद्ध तथा क्रूज सर्किट सञ्चालन, गन्तव्य व्यवस्थापन, संयुक्त मार्केटिङ, सांस्कृतिक आदानप्रदान कार्यक्रम, भिसा सहजीकरण, तथा बिमस्टेक ट्राभल एण्ड टुरिज्म मार्टको वार्षिक आयोजना जस्ता विषयमा विस्तृत छलफल भएको थियो । साथै, सीमापार यात्रा सहज बनाउन विशेष पर्यटकीय सर्किटको विकास तथा अन्वेषण गर्ने विषयसमेतलाई बैठकको प्राथमिकतामा राखिएको थियो ।
बैठकको निष्कर्षले सार्वजनिक–निजी साझेदारीलाई थप मजबुत बनाउँदै, पर्यटन व्यवस्थापनमा सुधार ल्याउने तथा बिमस्टेक क्षेत्रमा निर्बाध सम्पर्कलाई प्रवर्द्धन गर्ने अपेक्षा गरिएको छ । यसले क्षेत्रीय पर्यटन वृद्धिमा महत्वपूर्ण योगदान पु¥याउने विश्वास गरिएको छ ।
–––
